Ахмадеева Хаписат Омаровна

Звукооператор. 1945-жылдын 11-февралында Дагестан АССРинин Махачкала шаарында кызматкердин үй-бүлөсүндө төрөлгөн. 1963-жылы орто мектепти аяктагандан кийин Ленинграддагы киноинженерлер институтунун электротехникалык факультетине тапшырган.

1968-жылдан баштап Х. Ахмадеева «Киргизтелефильм» студиясында звукооператор болуп иштейт. Ал 30дан ашык документалдык жана көркөм фильмдерди, концерттик фильмдерди, очерктерди үнгө салган. «Менин Турсун-апам» (1970), «Шаарыңды сүй» (1973), «Тоолордун балдары» (1973), «Керез» (1973), «Кыргызстандын түштүгүндө» (1974), «16 кыз» (1974), «Бир дагы кубанычтуу күн» (1975) сыяктуу фильмдердин үн чечимдери визуалдык катардагы стилистикалык бирдикте, үн жаздыруунун жогорку техникалык деңгээли менен айырмаланат.

Х. Ахмадеева «Керез» фильмдеги иши менен эл аралык телефильмдер фестивалына сунушталган. Бул лента Швеция, Нидерландия, Бельгия, Монголия тарабынан сатып алынган.

Тбилиси шаарындагы Бүткүл Союз телефильмдер фестивалында «Тоолордун балдары» фильми «Совет өлкөсүнүн балдары» циклынын алкагында дипломго ээ болгон.

Наградалары — СССРдин ВДНХсынын бронза медалы (1978).

1978-жылдан бери СССРдин СКнын мүчөсү.