Маковский Эдуард Эдуардович

Техникалык илимдердин доктору, профессор, Кыргыз Республикасынын Улуттук илимдер академиясынын академиги, Кыргыз ССРинин эмгек сиңирген ойлоп табуучусу, Кыргыз ССРинин илим жана техника тармагындагы Мамлекеттик сыйлыгынын лауреаты.

1930-жылы туулган. 1954-жылы Ташкент суу чарба жана механизация институтунун гидроэнергетика факультетин аяктаган.

Кыргыз Республикасынын Улуттук илимдер академиясынын вице-президенти, физика-техникалык, математикалык жана геологиялык илимдер бөлүмүнүн төрагасы болуп иштеген. Суу чарбасында суу бөлүштүрүү процессин автоматтык башкаруу системаларын түзүү теориясы жана методдору боюнча адис катары белгилүү. Ал “оперативдик башкаруу” жана “диспетчердин кеңешчиси” Ат-Башы магистралдык каналынын подсистемасында пневмогидравликалык аппараттарды сунуштап, өндүрүшкө киргизген. Республика боюнча жана анын чегинен тышкары 70тен ашык суу алуу курулмасында селге каршы автоматтык система киргизилген.

Кыргыз ССРинин Жогорку Кеңешинин Ардак грамоталары, “Эрдик эмгеги үчүн. В. И. Лениндин туулган күнүнүн 100 жылдыгына карата” юбилей медалы, “Эмгек сиңиргендиги үчүн” медалы менен сыйланган. СССР Жогорку Кеңешинин Президиумунун жарлыгы менен эл чарбасын өнүктүрүүдөгү жетишкендиктери үчүн алтын медаль жана эки күмүш медаль менен сыйланган.

160тан ашык илимий эмгектери, анын ичинде 7 монографиясы жарык көргөн, 45 ойлоп табуунун автору.

Өндүрүшкө киргизилген негизги ойлоп табуулар:

1. Суу берүү каналынын суу деңгээлин жөнгө салуучу аппарат. Автордук күбөлүк №172075,1965.
2. Суу берүү каналынын суу деңгээлин жөнгө салуучу аппарат. Автордук күбөлүк №196229,1967.
3. Каналдардагы суу деңгээлин жөнгө салуучу аппарат. Автордук күбөлүк №351966,1972.
4. Гидротехникалык курулмалардагы суу деңгээлин стабилдештирүүчү аппарат. Автордук күбөлүк №589327,1978.
5. Гидротехникалык курулмалардагы суу деңгээлин стабилдештирүүчү аппарат. Автордук күбөлүк №456873,1975.