Кыргыз Республикасынын экология жана табигый ресурстар министр Акыл Токтобаев Баткен облусуна болгон жумушчу сапарынын алкагында «Айгуль-Таш» коруктугуна барып, Кызыл китепке кирген уникалдуу Айгуль гүлү өсүп жаткан жерди көрдү. Бул тууралуу КРнын экология министрлигинин басма сөз кызматынан билдиришти.
Токтобаев бул гүл Баткендин символу болуп саналгандыктан, ага өзгөчө көңүл бурулушу керектигин белгилеп, инспекторлорго коруктуктун экосистемасы баштапкы абалында сакталуусун жана зыяндуу таасирлерге дуушар болбошун көзөмөлдөөнү тапшырды.
Мындан тышкары, министр уникалдуу түстөгү тоолор менен эски океандын түбү болгон «Мадыген» табигый эстеликке да барды.
«Мадыген - бул биздин жалпы табигый байлыгыбыз, аны келечек муундар үчүн сактоо керек», - деп баса белгиледи министр.Ал ошондой эле инспекторлорго коруктуктарда жашаган жаныбарларга адамдын иш-аракеттеринин терс таасирлерин алдын алууну тапшырды.
«Эч кандай иш-аракет бул уникалдуу табигый бурчтардын гармониясы жана сулуулугун бузбашы керек», – деп кошумчалады Акыл Токтобаев.
