Жогорку Кенештин финансылар, бюджет жана ишкердик боюнча комитетинин жыйынында депутаттар Кыргыз Республикасы менен Италиянын ортосундагы инвестицияларды колдоо жана коргоо боюнча келишимди биринчи окууда ратификациялашты.
Улуттук инвестициялар агенттигинин орун басары Дамирбек Бикулов документ 2025-жылдын 30-майында Астанада кол коюлганын жана бул Кыргызстандын өкмөт башчысынын демилгеси болгонун билдирди.
Анын айтымында, мыйзам долбоорунун максаты эки өлкөнүн ортосунда экономикалык кызматташтыкты бекемдөө жана инвестициялык мамилелерди кеңейтүү болуп саналат. Бул эл аралык юридикалык документ.
Депутат Камила Талиеванын Италиядан Кыргызстанга азыркы убакка чейин канча инвестиция тартылганы тууралуу суроосуна Бикулов, 2025-жылдын үч кварталында бул көрсөткүч 2 миллион долларды түзгөнүн айтты.
«Италиялык тарап негизинен өз технологияларын сунуштайт. 2024-жылы президенттин Италияга болгон сапарынын натыйжасында белгилүү келишимдерге жетишилди. Бул документ биздин өлкөлөрдүн ортосундагы келечектеги кызматташтык үчүн жакшы негиз түзөт», - деп кошумчалады ал.
Депутат Улан Примов Кыргызстан Италияга кандай товарларды экспорттоону пландап жатканын кызыкты.
Бикулов негизги товарлар органикалык жана текстиль продукциясы болорун тактады.
