Бүгүн Кыргызстан экономика жана соода министри Бакыт Сыдыков менен Борбордук Азия боюнча Дүйнөлүк банктын регионалдык директору Наджи Бенхассиндин ортосунда жолугушуу өттү.
Министрликтин маалыматына ылайык, Кыргызстан менен Дүйнөлүк банк ортосундагы кызматташтыктын аспекттери талкууланды.
Сыдыков өлкөнүн экономикасынын учурдагы абалы тууралуу маалыматтарды бөлүшүп, акыркы жылдарда негизги секторлордун комплексдүү өнүгүүсүнүн натыйжасында өсүш байкалганын белгиледи.
Сүйлөшүү учурунда Дүйнөлүк банк тарабынан каржыланган иштеп жаткан долбоорлорду ишке ашыруу жана кызматташтыкты мындан ары бекемдөө жана кеңейтүү пландары тууралуу басым жасалды.
Наджи Бенхассин Дүйнөлүк банктын Кыргызстан менен кызматташтыкты улантууга даярдыгын тастыктап, экономикалык өсүштөгү оң тенденцияларды белгиледи.
Жолугушуунун жыйынтыгы менен эки тарап мурда жетишилген келишимдерди ишке ашыруу боюнча активдүү иштөө ниеттерин билдиришти.
