2025-жылы Кыргызстанда 119 өнөр жай ишканасы ачылып, 8 451 жаңы жумуш орду түзүлгөн. Бул тууралуу өкмөт башчысы Адылбек Касымалиев «Ынтымак Ордо» борборунда өткөн республикалык жыйында билдирди.
Касымалиев өнөр жай секторун өнүктүрүүгө 715,6 миллион доллар инвестиция салынганын белгиледи.
«Акыркы беш жылда өлкөнүн өнөр жайы маанилүү өзгөрүүлөргө учурап, индустриализация процессинин коштоосунда болду. Бул мезгил өндүрүштү модернизациялоо, жүздөгөн жаңы ишканаларды ачуу, технологиялык жаңылануу жана ички рынокту камсыз кылуу үчүн убакыт болду. Өнөр жайды өнүктүрүүгө багытталган мамлекеттик саясат системалуу мүнөзгө ээ болду. Ички жана экспорттук өндүрүштү көбөйтүүгө багытталган ири долбоорлор ишке ашырылууда. Инвестициялык климат кыйла жакшырды, жаңы ишканалар курулду. “Жүз өнөр жай ишканасы” программасынын алкагында 2025-жылы 715,6 миллион доллар жалпы инвестициялар менен 119 объект пайдаланууга берилди, бул 8 451 жумуш ордун түзүүгө мүмкүндүк берди», - деп баса белгиледи Касымалиев.
Учурда «Ынтымак Ордо» борборунда 2025-жылдын жыйынтыктарына арналган республикалык жыйын өтүп жатат, ага президент Садыр Жапаров катышууда.
Жыйында өкмөт мүчөлөрү, мамлекеттик мекемелердин жетекчилери, президенттин облустардагы ыйгарым укуктуу өкүлдөрү, Бишкек жана Ош шаарларынын мэйлери, ошондой эле райондордун акимдери катышууда.
