Бул тууралуу NABU Кыргызстан уюмунун түштүк бөлүмүнүн басма сөз кызматы маалымдады.
Анын маалыматына ылайык, уюмдун кызматкерлери Ош облустук экология жана табигый ресурстар министрлигинин атайын корголуучу табигый аймактар жана биологиялык ар түрдүүлүк бөлүмүнүн өкүлдөрү, ошондой эле милициянын патрулдук-күзөт кызматынын кызматкерлер менен биргеликте Кара-Суй жана Ноокат райондорунда кезектеги рейд өткөрүштү. Рейддин максаты аңчылык эрежелеринин талаптарын сактоо жана ок атуучу куралдардын мыйзамдуулугун көзөмөлдөө болду.
«Алгач рейд Кара-Суй районунда өттү. Анын жыйынтыгында эки жаран аңчылык эрежелеринин талаптарын бузганы аныкталды. Аларга, укук бузуулар кодексинин 263-беренесине ылайык, 12 500 сомдон айып пул, ошондой эле 133-беренеге ылайык, 3 000 сомдон айып пул белгиленди. Жыйынтыкта: 28 миң сом айып пул.
Ошондой эле, бул рейд Ноокат районунда да өткөрүлдү. Ал жерде, Төөлөс айылындагы Жылгын-Сай участогунда, төрт жаран алты кушту клеткада мыйзамсыз кармап турганы аныкталды. Натыйжада, алардын ар бирине, укук бузуулар кодексинин 261-беренесине ылайык, 10 миң сомдон айып пул белгиленди — жалпы 40 миң сом», - деп айтылат маалыматта.
Ошентип, жалпы айып пулдардын суммасы 68 миң сомду түздү. Рейд учурунда жергиликтүү тургундар менен айлана-чөйрөнү коргоо жана аңчылык эрежелерин сактоо боюнча түшүндүрүү иштери да жүргүзүлдү.
