Жыйынга 15 депутат, мэр Р.Норузбаев, мэриянын кызматкерлери жана шаардык мекемелердин жетекчилери катышты.
Жыйында мэрия жана шаардык кеңеш тарабынан биргеликте иштелип чыккан муниципалдык бюджет бекитилди. Бюджеттин жалпы суммасы 140 млн сомдон ашып, бул шаар үчүн рекорд болуп эсептелет. Бул бюджеттин алкагында 2026-жылы ишке ашырылуучу масштабдуу долбоорлор каралган.
«Күн тартибиндеги негизги маселе 2026-жылга бюджетти бекитүү болду. Депутаттар 140 млн сомдук тарыхый жогорку бюджетти макулдашты», — деп билдирди жыйындын катышуучусу.
Бекитилген бюджетке ылайык, депутаттардын жана К.Джеенчороевдин жетекчилигиндеги туруктуу бюджеттик комиссиянын сунушу менен, 2026-жылы шаардык инфратүзүмдү жакшыртууга жана жарандардын жашоо сапатын жогорулатууга багытталган негизги долбоорлор ишке ашырылат. Тизме төмөнкүлөрдү камтыйт: борбордук шаардык паркты түзүү; ЖКХ үчүн атайын техникаларды сатып алуу; канализация жана суу түтүктөрүн модернизациялоо жана оңдоо; балдар үчүн оюн жана воркаут аянтчаларын орнотуу; автомобиль жолдорун калыбына келтирүү; скверлерди көрктөндүрүү; таштанды жайларын жаңылоо.
Сессиянын жыйынтыгы боюнча мэрияга бюджеттик каражаттарды максаттуу, натыйжалуу жана убагында пайдаланууну камсыз кылуу, ошондой эле пландалган иш-чараларды туура ишке ашыруу үчүн бардык зарыл чараларды көрүү тапшырылды», - деп белгиленет расмий билдирүүдө.
