Жогорку Кенештин депутаты Бекмурза Эргешов Кыргыз Республикасынын сот адилеттиги боюнча кеңешине мүчө болуп шайланды.
Сот адилеттиги, кылмыштуулук жана коррупция менен күрөшүү боюнча комитеттин төрагасы Болот Борбиевдин айтымында, депутаттар арасынан бул кеңешке бир өкүлдү тандоо керек болчу.
Натыйжада, комитет Бекмурза Эргешов жана Кубанычбек Самаковдун талапкерлигин сунуштады.
77 депутаттын катышуусунда өткөн жашыруун добуш берүүнүн натыйжалары төмөнкүдөй болду: 22 добуш Самаковго, 52 добуш Эргешовго, 3 депутат бардыкка каршы добуш берди.
Ошентип, Бекмурза Эргешов Кыргыз Республикасынын сот адилеттиги боюнча кеңешинин жаңы мүчөсү болуп калды.
