Жыйында 2025-жылга Министрлер кабинетинин иш-аракеттер планынын аткарылышы тууралуу отчет сунушталды. Планды аткаруу боюнча докладды Президенттин администрациясынын саясий жана экономикалык изилдөөлөр башкармалыгынын начальниги Нурбек Ташбеков жасады.
Талкуу министрликтердин, мамлекеттик агенттиктердин, ошондой эле Бишкек жана Ош шаарларынын Министрлер кабинетинин тапшырмаларын аткаруу контекстиндеги ишин камтыды. Айрым ведомстволордун жетишкендиктери жана иштеги кемчиликтер менен байланыштуу, айрым жетекчилерге дисциплинардык чараларды кабыл алуу чечими кабыл алынды.
Министрлер кабинетинин төрагасы Адылбек Касымалиев иш-аракеттер планын аткарууну баалоо үчүн иштелип чыккан методика өкмөт тарабынан бекитилгенин жана быйылкы жылы колдонулганын белгиледи. Ал: «Биз көптөгөн оң натыйжаларды көрүп жатабыз, бирок объективдүү жана субъективдүү себептерден улам чечилбей калган көйгөйлөр да бар. Биздин негизги максатыбыз — мамлекеттик органдардын ишин жөн гана баалоо эмес, бул планды аткаруу аркылуу өлкөнүн Улуттук өнүгүү программасын жогорку сапатта ишке ашырууну камсыз кылуу. Катуу аткаруу дисциплинасын сактоо аркылуу биз социалдык-экономикалык өнүгүүнү тездетип, элдин жашоо деңгээлин жакшырта алабыз», — деди.
2025-жылга иш-аракеттер планынын алкагында көптөгөн маанилүү иш-чаралар ишке ашырылды. Мамлекеттик органдардын иши 292 иш-чаранын негизинде бааланды, мониторинг жана анализ өнөр жай, агроөнөр жай комплекси, транспорт, энергетика, цифрлаштыруу, инвестициялар, курулуш жана социалдык тармак сыяктуу тармактарда жүргүзүлдү.
