Талкуу учурунда катышуучулар Германиянын финансылык колдоосу менен ишке ашырылып жаткан «Саламаттык сактоо V» сектордук программасынын учурдагы жетишкендиктерин карашты. Ошондой эле медициналык мекемелердеги системанын техникалык колдоосу, маалыматтарды актуалдаштыруу жана туруктуу иштеши боюнча аспектилер талкууланды.
Иш-чаранын алкагында 150 принтер жана 1000 картриджди камтыган жабдуулар тапшырылды, алар жумуш процессин оптималдаштыруу жана медициналык жабдууларды санариптик эсепке алуу үчүн колдонулат.
Бүгүнкү күндө долбоорго кирген бардык медициналык мекемелер кызматкерлер үчүн окутуудан өтүп, системаны ишке киргизишти. Региондордо медициналык жабдууларды инвентаризациялоо улантылууда. Айрыкча, Бишкек жана Чүй облусунда негизги этаптар аякталды жана маалыматтарды туруктуу актуалдаштыруу башталды.
Тийиштүү бөлүмдөрдүн кызматкерлери да маалыматтарды базага сапаттуу киргизүү үчүн окутуудан өтүштү. Келечекте медициналык жабдууларды эсепке алуу функциясын мамлекеттик «Кыргызфармация» ишканасы өзүнө алат.
«Биз Германиянын өнүктүрүү банкы (KfW) жана GITEC-IGIP консалтинг компаниясына колдоосу үчүн ыраазычылык билдиребиз. Бул кызматташтык биздин өлкөнүн саламаттык сактоо системасынын туруктуулугун жана натыйжалуулугун жогорулатууга көмөктөшөт», — деди Айбек Маткеримов.
Кийинки кадам — техникалык колдоону уюштуруу жана саламаттык сактоодо санариптик чечимдерди өнүктүрүү.
