Кыргызстандын президенти Садыр Жапаров акыркы беш жылда «Ала-Арча» мамлекеттик табигый паркынын кирешеси дээрлик тогуз эсе өскөнүн билдирди. Бул маалымат жаңы канаттуу жолдун ачылышынын аземинде айтылды.
2020-жылы парктын кирешеси 29 миллион сомду түзсө, 2025-жылга карата бул көрсөткүч 262 миллион сомдон ашып кеткен.
Мамлекет башчысы мындай жетишкендиктер системалуу реформаларды жүргүзүү жана санариптик технологияларды киргизүү аркылуу мүмкүн болгонун белгиледи. Ал мамлекеттик мекемелердин электрондук төлөмдөргө өтүшү ачыктыкты жогорулатууга, адам факторунун таасирин азайтууга жана мамлекеттик мүлктү башкарууну жакшыртууга жардам бергенин баса белгиледи.
Садыр Жапаров ошондой эле жетишилген натыйжалар процесстерди тартипке келтирүү, санариптештирүү жана мамлекеттик активдерди натыйжалуу башкаруу менен байланыштуу экенин кошумчалады.
