Табигый ресурстар, экология жана техникалык көзөмөл министрлигинин экологиялык жана техникалык көзөмөл кызматы билдиргендей, Баткен облустук башкармалыгынын атайын корголуучу табигый аймактар жана биологиялык ар түрдүүлүк бөлүмүнүн кызматкерлери укук коргоо органдары менен биргеликте жүргүзүлгөн ыкчам иш-чаралардын жүрүшүндө жапайы ферула (сасык чайыр) уруктарын мыйзамсыз ташуу фактын аныкташты. Кармалган жаран Баткен облусунун Лейлек районунун Кара-Суу айылында жашаган Э. Ж. болуп, анын колунда жалпы 1 тонна аталган өсүмдүктүн уруктары табылган.
Кармалган жаранга мыйзам бузуулар кодексинин 264-беренесине («Жапайы өсүмдүктөрдүн уруктарын жана (же) алардын бөлүктөрүн жана продукцияларын сатып алуу жана сатуу тартибин бузуу») ылайык 10 миң сом өлчөмүндө административдик айып пул салынды.
КР өкмөтүнүн 2013-жылдын 3-майындагы №224 токтомуна ылайык, өсүмдүк дүйнөсүнө келтирилген зыян үчүн 500 миң сом өлчөмүндө доо коюлду.
Экологиялык көзөмөл кызматы мыйзамсыз жапайы өсүмдүктөрдүн уруктарын чогултуу жана сатуу табиятка олуттуу зыян келтирерин эске салды. Мындай аракеттер биологиялык ар түрдүүлүктүн кыскарышына жана экосистеманын туруктуулугунун бузулушуна алып келет. Табигый ресурстар, экология жана техникалык көзөмөл министрлиги жарандарды табигый байлыктарды мыйзамсыз пайдаланбоого жана табигатты коргоо мыйзамдарын катуу сактоого чакырат.
