Анын айтымында, 2025-жылы Талас облусунун прокуратура органдары жана укук коргоо структуралары тарабынан коррупциялык жана ага байланыштуу кызматтык кылмыштар боюнча жалпы 86 кылмыш иши козголгон. Бул көрсөткүч 2024-жылга караганда эки эсе жогору. Мурда козголгон иштерди жана башка ведомстволордон келип түшкөн материалдарды эске алганда, укук коргоо органдарында жалпы 112 (72) кылмыш иши жүрүп жатты.
Тергөө натыйжалары боюнча 50 (34) кылмыш иши сотко жиберилген, 40 (24) иш боюнча өндүрүш токтотулган.
Бул кылмыш иштеринин алкагында мамлекетке келтирилген жалпы материалдык зыян 488 млн 850 миң 605 (52 млн 222 миң 921) сомду түздү. Бул сумма ичинен 465 млн 206 миң 900 (51 млн 957 миң 461) сом өндүрүлгөн, бул болсо белгиленген зыяндын 95,1%ын түзөт.
Талас облусунун прокуратура бөлүмүнүн улук прокурорунун айтымында, анализдер 2025-жылы мамлекетке келтирилген зыяндын жалпы көлөмү жана анын калыбына келтирүү көрсөткүчтөрү кыйла өскөнүн көрсөтүүдө. Айрыкча, өндүрүлгөн каражаттардын суммасы 413 млн 249 миң 439 сомго өскөн. Бул, подполковник Курманбековдун пикири боюнча, укук коргоо органдары тарабынан кабыл алынган чаралардын натыйжалуулугун жана коррупциялык кылмыштарга каршы күрөштүн күчөшүн көрсөтөт. Мамлекеттик кызыкчылыктарды коргоо жана бюджетке келтирилген зыянды толук калыбына келтирүү боюнча иштер пландуу режимде улантылууда.
Ал «Коррупцияга каршы күрөшүү жөнүндө» мыйзамга ылайык, прокуратура органдары коррупцияга каршы күрөшүү боюнча координациялык жыйындарды жетектеп, бардык укук коргоо органдары тарабынан мыйзамдардын так жана бирдей аткарылышын көзөмөлдөп турганын эске салды. Бул иш-чаралар башкы прокурордун жана облус прокурорунун көрсөтмөлөрүнө ылайык өткөрүлөт.
Курманбековдун айтымында, прокуратура органдарынын негизги милдеттери коррупциялык көрүнүштөрдүн алдын алуу, алардын убагында аныктоо, токтотуу жана мыйзам чегинде күнөөлүү адамдарды жоопко тартууну камсыз кылуу болуп саналат. Бюджеттик каражаттарды мыйзамсыз пайдалануу, кызматтык абалынан кыянаттык менен пайдалануу жана кызматтык ыйгарым укуктарды ашыкча пайдаланууга өзгөчө көңүл бурулат.
«Мамлекетке келтирилген материалдык зыянды так жана толук аныктоо, ошондой эле аны өндүрүү боюнча натыйжалуу чараларды кабыл алуу приоритеттүү багыттардын бири болуп калууда. Бул максатта тергөө стадиясында зыяндын көлөмүн аныктоого, шектүүлөрдүн мүлкүн камакка алууга, жарандык доо арыздарды берүү жана сот чечимдеринин аткарылышын камсыз кылууга өзгөчө көңүл бурулат. Коррупциялык кылмыштарды жасоого күнөөлүү адамдар милдеттүү түрдө жоопко тартылат, аларга катуу жана компромисссиз чаралар колдонулат. Прокуратура органдары коррупциялык кылмыштарга каршы күрөштү күчөтүүнү, мамлекеттин жана коомдун кызыкчылыктарын коргоону, ошондой эле бюджетке келтирилген зыянды толук калыбына келтирүү боюнча иштерди улантууну көздөшөт», - деди Талас облусунун прокуратура бөлүмүнүн улук прокурору.
