«Кыргызнефтегаз» акционердик коомунун директорлор кеңешинин чечимине ылайык, компаниянын башкармалыгынын төрагасы болуп Самсаалы Четимбаев шайланды. Бул маалыматты ишкананын басма сөз кызматы билдирди.
Анын кандидатурасы негизги акционер — Кыргыз Республикасынын мамлекеттик мүлк башкаруу агенттигинен сунушталган.
Бул мекеменин орун басары Бекзат Абдикахаров жаңы жетекчини жамаатка тааныштырды.
Самсаалы Четимбаевдин алдында маанилүү милдеттер турат: өндүрүш кубаттарын модернизациялоо, мунай жана газ өндүрүүнү көбөйтүү, ошондой эле башкарууга заманбап санариптик технологияларды киргизүү.
«Кыргызнефтегаз» стратегиялык жактан маанилүү объект болуп саналат жана өлкөдөгү эң ири салык төлөчүлөрдүн бири болуп, Кыргызстандын түштүк регионунун энергетикалык коопсуздугун камсыздоодо негизги роль ойнойт.
