Военно-Антоновка айылында М. аттуу эркек жергиликтүү тургунду алдап, 7 миллион сомдон ашык акчага ээ болду.
Чүй облусунун Ички иштер башкармалыгы тарабынан берилген маалыматка ылайык, 2025-жылдын 21-ноябрында 54 жаштагы А.Ж. аттуу жаран полицияга алдамчылык тууралуу арыз менен кайрылган. Анын айтымында, 2025-жылдын 30-сентябрында «РИОМ» авто базарында алдамчы 65 атты жалпы баасы 7 020 000 сомго Казакстандан Кыргызстанга «Ак-Жол» өткөрмө пункту аркылуу өткөрүп берүүнү сунуштаган. Натыйжада, ал жабырлануучудан 2 000 000 теңге алып, мал менен качып кеткен.
Военно-Антоновка тургуну үчүн 7 330 400 сомдук олуттуу материалдык зыян келтирилди.
Бул окуя боюнча тергөө органдары Кыргыз Республикасынын Кылмыш-жаза кодексинин 209-беренеси (Алдамчылык) боюнча кылмыш ишин козгоду. Тергөө учурунда милиция кызматкерлери шектүүнү — 39 жаштагы К.М. аттуу жаранды аныктап, кармап, Кыргыз Республикасынын УПКсынын 96-беренесинин нормаларына ылайык убактылуу кармоо жайына жайгаштырды.
Учурда болгон окуянын бардык жагдайларын аныктоо үчүн тергөө иштери улантылууда.
