Сокулук районунда ички иштер органдары чет элдик жарандар иштеген курулуш аянттарында бир катар профилактикалык иш-чараларды өткөрүштү. Бул тууралуу Чүй облусунун Ички иштер башкармалыгынын маалымат кызматы билдирди.
Бул иш-чаралардын максаты жарандардын арасында коомдук тартипти жана тынчтыкты сактоо болду. Полиция кызматкерлери курулуш аянттарына барып, чет элдик жумушчулар менен түшүндүрүү сүйлөшүүлөрүн өткөрүштү.
Жолугушуулар учурунда жумушчулар Кыргыз Республикасынын мыйзамдык талаптары, миграция нормаларын сактоо эрежелери жана жарандардын милдеттери, ошондой эле укук бузуулар үчүн жоопкерчилик жөнүндө маалымат алышты. Жергиликтүү тургундардын тынчтыгын камсыз кылууга жана алардын эс алуу укугун коргоого жардам берүүчү нормаларга өзгөчө көңүл бурулду.
Айрыкча, куруучуларга көп кабаттуу үйлөрдүн курулуш объектилериндеги жарандардын тынчтыгын бузууга тыюу салган «Тынчтык жөнүндө» мыйзам тууралуу эскертишти. Жумушчуларга курулуш иштерин жүргүзүүдө убактылуу чектөөлөрдү жана эрежелерди сактоонун маанилүүлүгү түшүндүрүлдү.
Ички иштер башкармалыгы мындай профилактикалык иш-чаралар укук бузуулардын алдын алуу, жумушчулардын укуктук сабаттуулугун жогорулатуу жана райондук коомдук тартипти бекемдөө үчүн багытталганын белгиледи.
