Кыргызстандын борбору Бишкекте, чоң көлөмдөгү афган гашишин сатууга шектелген адамдар кармалды. Ички иштер министрлигинин мыйзамсыз наркотик жүгүртүүгө каршы күрөшүү кызматы берген маалыматка ылайык, «Притон» аттуу операциянын алкагында оперативдик иш-чаралар өткөрүлүп, 1989-жылы туулган Р.А.А. аттуу жаран кармалган. Анын курткасынан гашиш табылган.
Кийинки иш-чаралардын жүрүшүндө кылмыштуу топтун уюштуруучусу — 1975-жылы туулган С.Н.К. аныкталган. Анын жашаган жерин тинтүү учурунда чоң көлөмдөгү афган гашиши (чарс) алынган.
Бул иш боюнча тергөө Кыргыз Республикасынын Кылмыш кодексинин 282-беренеси «Наркотикалык каражаттарды, психотроптук заттарды жана алардын аналогдорун сатуу максатында мыйзамсыз даярдоо» боюнча кылмыш куугунтугун баштады. Алынган заттар боюнча сот-химиялык экспертизалар дайындалды.
Тергөө уланууда, укук коргоо органдары бул топтун башка мүчөлөрүн аныктоо боюнча иш алып барууда.
