Ирандагы экономикалык кризис массалык нааразычылык акцияларынын себеби болуп, алар бир нече күндөн бери уланууда. Нааразычылык акциялары Тегерандын гана эмес, Исфахан жана Шираз сыяктуу ири шаарлардын да аймагын камтыды.
Жарандардын нааразычылыгын жараткан негизги факторлорго иран риалынын курсу кескин төмөндөп кетиши, азык-түлүк жана биринчи керектелүүчү товарлардын баасынын өсүшү, ошондой эле жогорку инфляция кирет. Нааразычылык билдиргендер социалдык жана экономикалык тармакка байланыштуу талаптарды коюп жатышат, бирок кээ бир шаарларда саясий ураандар да угулууда.
Чет өлкөлүк булактардан алынган маалыматтарга ылайык, кээ бир аймактарда нааразычылык акциялары укук коргоо органдары менен кагылышууларга айланып кеткен. Каза болгондор жана жаракат алгандар, ошондой эле ондогон кармалгандар тууралуу маалыматтар бар. Муну менен бирге, бийлик коопсуздук чараларын күчөтүп, полиция жана атайын кызматтардын кызматкерлеринин санын көбөйтүп, интернетке жана социалдык тармактарга кирүүгө чектөөлөрдү киргизди. Ирандын расмий өкүлдөрү кырдаал контролдо экенин билдирип, баш аламандыкты "сырттан келген күчтөргө" айыптоодо.
