Бүгүн «Кыргызтест» мекемесинде, Улуттук тил жана тил саясаты боюнча комиссиянын колдоосу менен, эл аралык компьютердик тестирлөө пунктунун салтанаттуу ачылышы болуп өттү. Бул иш-чарада Кыргызстандын Мамлекеттик катчысы Арслан Койчиев катышты.
Салтанатта президенттин администрациясынын, министрлер кабинетинин, Жогорку Кеңештин өкүлдөрү, ошондой эле эл аралык National Educational Network (NEN) компаниясынын жана Улуттук илимдер академиясынын өкүлдөрү болушту. Катышуучулар бул окуянын өлкөдөгү тил саясатын өнүктүрүүдөгү маанисин талкуулашты.
Мамлекеттик катчы өз сөзүндө эл аралык компьютердик тестирлөө пунктунун ачылышы мамлекеттик тил стратегиясын ишке ашырууда маанилүү кадам экенин белгиледи.
Ачылыш учурунда тестирлөө пунктунун функционалдык мүмкүнчүлүктөрү, техникалык мүмкүнчүлүктөрү жана эл аралык кызматташтык багыттары тууралуу кеңири маалымат берилген презентация көрсөтүлдү. Катышуучулар тестирлөө процессин таанышууга мүмкүнчүлүк алышты.
Эл аралык компьютердик тестирлөө пунктун түзүү жарандарга заманбап тестирлөө кызматтарын көрсөтүүгө, ошондой эле мамлекеттик жана эл аралык деңгээлде таанылган баалоо стандарттарын киргизүүгө багытталган.
