Жыйынга мэр Нуртилек Орозбаев, кенештин төрагасы Чынгыз Кимсанов, депутаттар жана ар кандай мекемелер менен ишканалардын жетекчилери катышты. Жыйында жалпы 24 депутат болду.
Күн тартибине шаарды өнүктүрүү, бюджеттик саясат жана муниципалдык менчикти башкаруу боюнча маселелер коюлду.
Алгачкы пунктта 2026-жылга шаардык кенештин иш планын талкуулашты. Доклад менен төрага Чынгыз Кимсанов чыкты. Туруктуу комиссиянын төрагалары тарабынан сунуштар киргизилгенден кийин кийинки жылга иштин негизги багыттары аныкталды.
Мэр Нуртилек Орозбаев 2025-жылга ишмердүүлүгү тууралуу отчетун сунуштап, социалдык-экономикалык өнүгүү программасынын аткарылышы, калкка социалдык колдоо чаралары жана шаардык кенештин чечимдеринин ишке ашырылышы жөнүндө маалымат берди. Депутаттар отчетту талкуулап, суроолорду беришти жана мэрдин ишин канааттандырарлык деп баалашты.
Ошондой эле 2025-жылга муниципалдык менчик башкармалыгынын отчету каралды, анда муниципалдык мүлктүн абалы жана пайдаланылышы, мамлекеттик сатып алуулар жана аткарылган иштердин сапаты тууралуу маалымат берилди.
Төртүнчү маселе катары депутаттар 2025-жылга Кара-Кул шаар бюджетинин аткарылышын жана такталган планды бекитишти.
Бешинчи пункт 2024-жылга Счеттук палатасынын аудитинин жыйынтыктары тууралуу болду. Жетекчилер бюджеттин текшерүүсү жана муниципалдык ишканалардын ишмердүүлүгү боюнча аныкталган кемчиликтер боюнча түшүндүрмөлөрдү беришти.
Мындан тышкары, депутаттар 2025-жылга жайыттарды пайдалануу боюнча иш планын аткаруу отчетун угуп, 2026-жылга планды карашты.
Сессиянын жыйынтыгы боюнча бардык маселелер боюнча чечимдер кабыл алынды. Депутаттар шаарды туруктуу өнүктүрүү, бюджеттик тартипти сактоо жана муниципалдык менчикти эффективдүү башкаруу боюнча мындан аркы иштердин маанилүүлүгүн белгилешти.
