Бишкекте, Свердлов районунда, Рамазан айына арналган кайрымдуулук акциясы өттү. Иш-чаранын жүрүшүндө кыйын кырдаалда турган 75 үй-бүлөгө азык-түлүк пакеттер берилди, бул тууралуу жергиликтүү мэрия маалымдады.
Акциянын уюштуруучусу «Qatar Charity» кайрымдуулук фонду болду. Азык-түлүк пакеттер Свердлов районунун Социалдык өнүктүрүү башкармалыгында катталган үй-бүлөлөргө берилди. Алардын арасында аз камсыз болгон үй-бүлөлөр, мүмкүнчүлүгү чектелген адамдардын үй-бүлөлөрү жана кыйын жашоо шарттарына туш болгон адамдар бар.
Ар бир пакет негизги азыктарды камтыды: ун, күрүч, макарон, маш, кант, өсүмдүк майы, кургатылган жемиштер, чай, помидор, финик жана туз.
Бул инициатива социалдык жактан алсыз топторго жардам көрсөтүүгө багытталган жана коомдо кайрымдуулук, мээримдүүлүк жана өз ара жардамдашуу салттарын өнүктүрүүгө өбөлгө түзөт.
