Кыргыз Республикасында 2026-жылдын 20-мартынан 10-апрелине чейин айыл чарба каттоосу өтөт, анын жүрүшүндө чогултулган маалыматтардын катуу купуялуулугуна басым жасалат. Бул тууралуу Улуттук статистика комитети маалымдайт.
Нацстатком респонденттерден алынган маалыматтардын жалпыланган форматта гана жана статистикалык милдеттер үчүн колдонуларына кепилдик берет.
Маалыматтарды чогултуу Кыргыз Республикасындагы «Расмий статистика жөнүндө» мыйзамга ылайык жүргүзүлөт. Фермердик чарбалар жана өндүрүүчүлөр тууралуу жеке маалыматтар ачыкка чыгарылбайт жана үчүнчү жактарга, мамлекеттик органдарга, салык жана укук коргоо кызматтарына өткөрүлбөйт.
Бардык каттоочулар жеке маалыматтарды коргоо жана этикалык стандарттарды сактоо боюнча милдеттүү окутуудан өтүштү. Алардын ар бири алынган маалыматтын купуялыгын сактоого жооптуу.
Каттоодо колдонулган заманбап технологиялар маалыматтарды коргоонун жогорку деңгээлин камсыз кылат. Программалык чечимдер маалыматтарды шифрлөө жана маалымат базаларына чектелген кирүү мүмкүнчүлүгүн камтыйт, бул маалыматтарга уруксатсыз кирүүнүн мүмкүнчүлүгүн жокко чыгарат.
Улуттук статистика комитети каттоого катышуучуларды маалыматтарды чогултуу процессине ишенүүгө жана так маалыматтарды берүүгө чакырат. Бул республикадагы айыл чарбасынын өнүгүүсүнүн объективдүү статистикасын түзүү жана негиздүү башкаруу чечимдерин кабыл алуу үчүн маанилүү.
Купуялык, коопсуздук жана ишеним - сапаттуу статистиканын негизги элементтери.
