Президенттин администрациясы ишкер Шаршенбек Абдыкеримовдун «Томми молл» соода борбору боюнча кайрылуусуна байланыштуу текшерүүлөрдү баштады. Бул тууралуу журналисттерге мамлекет башчысынын басма сөз катчысы Аскат Алагозов билдирди.
Ал учурда кайрылууда баяндалган фактыларды кылдат изилдөө жүрүп жатканын белгиледи.
«Биз мыйзамда белгиленген процедураларга ылайык текшерүүлөрдү жүргүзүп жатабыз», - деп кошумчалады Аскат Алагозов.
Эске салсак, мурда Шаршенбек Абдыкеримов президент Садыр Жапаровго «Томми молл» айланасындагы жагдайды иликтөө өтүнүчү менен расмий кайрылган, объекттин баасы кыйла төмөндөтүлгөнүн жана ал мурдагы УКМКнын төрагасы Камчыбек Ташиевдин жубайы менен байланышкан адамдарга өткөрүлүп берилгенин билдирген.
Камчыбек Ташиевдин уулу Тай-Мурас Ташиев бул айыптоолорду четке какты, алар негизсиз экенин айтты.
