30 жаштагы Тараскан 5 жылдан бери «Чебурашка» бала бакчасында иштейт.
«Менин апам мугалим, ошондуктан анын жолунан кете турган болдум жана Нарын мамлекеттик университетине тапшырдым. Карьерамды Кочкор айылындагы мектептен баштадым. 2013-жылдан бери мектепке чейинки мекемеде иштейм. Балдар менен иштегени мага жагат. Алар үчүн пластик бөтөлкөлөрдөн жана кагаздан ар кандай оюнчуктар жасайм. Кесиптештерим менен биргеликте балдар үчүн көрнөк-жарактарды даярдайбыз. Бала бакчанын имараты мультфильмдердин жана жомоктордун ар кандай каармандары менен кооздолгон», - дейт ал.
Тараскан «Эң мыкты тарбиячы — 2018» конкурсуна жеңүүчү болгонун кошумчалады.
«Бул конкурста 5 жылдан бери катышып, биринчи орундарды ээлеп келем. Мындан тышкары, быйыл Нарын шаарынын 150 жылдыгына карата «Калаа келечекте» конкурсу өткөрүлдү. Биз кесиптештерим менен макет жасап, 1-орунду алдык. Эмгегим үчүн мэрия жана шаардык билим берүү бөлүмү тарабынан Ардак грамоталар менен сыйландым», - деп айтып берди ал.
Тараскан күйөөсү - Өмүрбек Молдокулов менен кыз тарбиялап жатканын белгиледи.