2-февралда Кыргыз Республикасынын Табигый ресурстар, экология жана техникалык көзөмөл министрлигинин имаратында министр Медер Машиевдин Кореянын эл аралык кызматташтык агенттигинин (KOICA) өкүлдөрү менен жолугушуусу болуп өттү.
Кеңешмеде Кыргызстандагы аба сапатын жакшыртууга багытталган долбоорду ишке ашыруу темасы көтөрүлдү. Бул долбоор 2026-2028-жылдар аралыгында Бишкек шаарында жана Чүй облусунда ишке ашырылат.
Долбоордун алкагында Түштүк Корея өкмөтүнөн $10 миллионго чейин кайтарымсыз жардам алуу каралган. Долбоордун негизги милдеттери булгануу заттарынын чыгымдарын азайтуу, аба сапатын башкаруу боюнча комплексдүү планды иштеп чыгуу жана мамлекеттик билим берүү мекемелеринде экологиялык жактан таза жылуулук системаларын киргизүү болуп саналат.
