Жалал-Абад облусунун Базар-Коргон районунда «АгроЗооВет–2026» долбоорунун алкагында өткөрүлгөн окутуу семинары болуп өттү.
Суу ресурстары, айыл чарба жана кайра иштетүү өнөр жайы министрлиги билдиргендей, бул иш-чаранын негизги максаты фермерлердин жана айыл чарба тармагындагы адистердин билимдерин жогорулатуу, жаңы агротехнологияларды киргизүү жана айыл чарбаны өнүктүрүү боюнча актуалдуу маселелерди талкуулоо болду.
Семинарга Базар-Коргон райондук мамлекеттик администрациясынын өкүлдөрү, Жаныбар чарбачылыгы жана ветеринария департаментинин адистери, Химизация, өсүмдүктөрдү коргоо жана карантин департаменти, ошондой эле кайра иштетүү өнөр жайы жана органикалык айыл чарба департаментинин өкүлдөрү катышты. Ошондой эле, министрликтин борбордук аппаратынын жана аймактык бөлүмдөрүнүн катышуучулары, мамлекеттик банктардын өкүлдөрү, «30+20+10» долбоорунда иш алып барган фермерлер жана кайра иштетүү ишканаларынын жетекчилери да болду.
Иш-чаранын жүрүшүндө катышуучуларга мал чарбачылыгын, ветеринарияны, азык базасын жакшыртууну, ошондой эле мамлекеттик колдоо чаралары жана каржылоо мүмкүнчүлүктөрү боюнча материалдар сунушталды.
