17-январда Лейлек райондук мамлекеттик администрациясында «АгроЗооВет–2026» долбоорунун алкагында окуу семинары өттү. Бул семинар Кыргыз Республикасынын Су ресурстары, айыл чарба жана кайра иштетүү өнөр жайы министрлиги тарабынан демилгеленген. Иш-чаранын негизги максаты фермерлердин жана агрардык сектордун адистеринин билим деңгээлин жогорулатуу, заманбап агротехнологияларды киргизүү жана айыл чарбасын өнүктүрүүгө байланыштуу маанилүү маселелерди талкуулоо болду.
Семинарда райондук администрациянын өкүлдөрү, профильдик министрликтердин кызматкерлери, ошондой эле аймактык бөлүмдөрдүн адистери, мамлекеттик банктар, фермердик чарбалар жана «30+20+10» долбоорунда катышкан кайра иштетүү ишканаларынын өкүлдөрү катышты.
Семинарда мал чарбачылыгын, ветеринарияны, азык базасын жакшыртууну, ошондой эле аграрийлер үчүн мамлекеттик колдоо чаралары жана финансылык мүмкүнчүлүктөр боюнча баяндамалар сунушталды.
