Жогорку Кенештин финансылар, бюджет, ишкердик жана атаандаштыкты өнүктүрүү боюнча комитетинин жыйынында «Кыргыз Республикасындагы салыктык эмес кирешелер жөнүндө» мыйзам долбооруна өзгөртүүлөрдү киргизүү экинчи окууда жактырылды.
Каржы министринин орун басары Нурбек Акжолов бул мыйзам долбоорунун максаты мамлекеттик кредиттерди төлөөнүн альтернативдүү ыкмаларын түзүү экенин белгиледи.
«Учурдагы эрежелер боюнча мамлекеттик кредиттерди төлөө белгилүү финансылык мекемелер аркылуу гана мүмкүн. Онлайн төлөмдөрдү терминалдар, мобилдик банктар жана электрондук капчыктар аркылуу жүргүзүү мүмкүнчүлүгүн киргизүү зарыл», - деп кошумчалады ал.
