Жогорку Кенештин өнөр жай саясаты, транспорт, отун-энергетикалык комплекс, архитектура жана курулуш боюнча комитетинин жыйынында транспорт жана байланыш министринин биринчи орун басары Бекназар Базаралиев 2026-жылга пландар тууралуу айтып берди. Ал жол курууга бөлүнгөн жалпы бюджет 39 миллиард 111 миллион сомду түзөөрүн билдирди.
Базаралиевдин маалыматына ылайык, аталган суммадан 1,5 миллиард сом Караколдун ички жолдоруна стабилизациялык фонддон жумшалат. Мындан тышкары, капиталдык салымдар 20 миллиард 680 миллион сомду түзөт, анын ичинен 17 миллиард 680 миллион сом Барскоон–Бедель жолун курууга жумшалат. Жол фонду 7 миллиард 949 миллион сом алат, бул сумма кошумча каражаттар келип түшкөндө көбөйтүлүшү мүмкүн.
457 километр жолду асфальттоо пландалууда, ал төмөнкү облустарда жүргүзүлөт:
- Чүй облусунда 83 км
- Нарын облусунда 74 км
- Талас облусунда 61 км
- Ысык-Көл облусунда 58 км
- Ош облусунда 76 км
- Жалал-Абад облусунда 65 км
- Баткен облусунда 37,4 км
