«Кумтор Голд Компани» алтын өндүрүүнүн көлөмү жана анын өздүк баасы тууралуу маалыматтарды жарыялады.
Кумтордо өндүрүш көлөмүнүн азайгандыгы жана алтындын баасынын жогорулагандыгы тууралуу акыркы убакта айтылган билдирүүлөр компанияны бул маселелер боюнча түшүндүрмө берүүгө мажбур кылды.
Компаниянын өкүлдөрү акыркы убакта кен иштетүү шарттары кыйын болуп калганын, бул алтынды алуу процессин кыйындатканын белгилешти.
Өздүк баанын жогорулашына себеп болгон факторлордун арасында акыркы жылдардагы белгилүү геополитикалык окуялар да аталат, алар күйүүчү-майлоочу материалдардын баасын 50% га, реагенттер жана химиялык заттардын баасын 70% га жогорулатууга алып келди.
Мындан тышкары, логистиканын татаалдашып кетиши жана транспорт чыгымдарынын 106,4% га жогорулашы да чыгымдардын кескин жогорулашына себеп болду. Эгер мурда жүк жеткирүү үч жумага созулса, азыр бул процесс үч айга чейин созулуп жатат», - деп тактады компания.
Ошондой эле, акыркы жылдары кен үчүн электр энергиясынын баасы 92% га жогорулады.
Жогоруда аталган факторлорду эске алганда, 2025-жылы алтындын өздүк баасы, бардык салык жана башка төлөмдөрдү кошкондо, унциясына 1 884 долларды түздү. Өткөн жылы 388 418 унция өндүрүлдү, бул 12 081 кг алтынга барабар.
2025-жылдын башында алтындын минималдуу сатуу баасы 2 882,7 долларды түзсө, жылдын аягында максималдуу баа 4 612,95 долларга жетти. Орточо сатуу баасы 3 711 долларды түздү.
Компаниянын 2025-жылдагы кирешеси 1 миллиард 434,6 миллион долларды, таза пайдасы 706 миллион 81 миң долларды түздү. Салык жана башка төлөмдөр катары 246 миллион 507 миң доллар төлөндү», - деп билдиришти «Кумтор Голд Компани».
