Кыргыз Республикасынын Су ресурстары, айыл чарба жана кайра иштетүү өнөр жайы министринин орун басары Р. Балтабаев Кореянын эл аралык кызматташтык агенттигинин (KOICA) делегациясы менен жолугушуу өткөрдү.
Бул жолугушууда Кыргызстандын «Кыргыз Агрохолдинг» акционердик коомунун өнөктөштүгү менен курулушу пландалган соода-логистикалык борборду (СЛБ) курууга даярдык боюнча негизги аспектилер талкууланды. Учурда долбоорду даярдоо боюнча активдүү иштер жүргүзүлүүдө.
KOICAнын өкүлдөрү долбоордун кийинки этаптары, анын ичинде долбоорлоо, финансылык колдоо жана уюштуруу боюнча маалымат менен бөлүшүштү. Эки тарап бул тармакта андан аркы кызматташууга даяр экендиктерин билдиришти.
Соода-логистикалык борбор Сокулук районунда жайгаштырылат жана анын жалпы реализациясы боюнча чыгымдар болжол менен 6 миллион АКШ долларын түзөт.
Долбоордун максаты айыл чарба продукциясын сактоо, кайра иштетүү жана сатуу үчүн инфраструктураны өнүктүрүү болуп саналат, бул болсо Кыргыз Республикасынын агрардык секторунун экспорттук потенциалын жогорулатууга жардам берет.
