10-декабрь күнү Кыргыз Республикасынын Президенти Садыр Жапаров Сауд Аравия Королдугунун Кыргызстандагы элчиси Ибрахим бин Ради Аль-Радини дипломатиялык миссиясынын аякташы менен кабыл алды.
Жолугушуунун жүрүшүндө мамлекет башчысы элчинин ишинин маанилүүлүгүн жана анын эки тараптуу мамилелерди өнүктүрүүгө кошкон олуттуу салымын белгиледи.
Президент ошондой эле Саудиянын өнүктүрүү фондунын Кыргызстандагы негизги социалдык-экономикалык долбоорлорду, анын ичинде жеткиликтүү турак жай, ооруканалар, мектептер жана инфраструктураны өнүктүрүү боюнча ишке ашыруудагы активдүү ролун баса белгиледи.
Садыр Жапаров эки өлкөнүн кызматташтыгы өз ара түшүнүү жана ишеним духунда өнүгө берет деп ишенерин айтып, элчиге келечекте ийгилик каалады.
Өз тараптан, Ибрахим бин Ради Аль-Ради кыргыз тарапка дипломатиялык ишмердүүлүгүнүн бардык мезгилинде көрсөтүлгөн колдоо үчүн ыраазычылык билдирди жана Королдуктун Кыргызстан менен достук мамилелерин дагы да бекемдөөгө болгон ниетин билдирди. Ал өлкөлөр ортосундагы кызматташтык олуттуу деңгээлге жеткенин жана андан ары тереңдетүү үчүн мүмкүнчүлүктөр бар экенин белгиледи.
Жолугушуунун соңунда президент Садыр Жапаров Ибрахим бин Ради Аль-Радиге Кыргызстан менен Сауд Аравиясынын ортосундагы достукту жана кызматташтыкты бекемдөөгө кошкон салымы үчүн Кыргыз Республикасынын Ардак грамотасын тапшырды. ```
