Мурда ал «Эң мыкты жаш улакчы» жана «Эң мыкты чабуулчу» наамдарына да татыктуу болгон.
Turmush агенттигинин кабарчысы менен болгон маегинде ал 2005-жылы Аламедин районунун Беш-Кунгей айылында туулганын айтты. Үй-бүлөдө – үч баланын улуусу. «Эки жашымдан бери атта отурам — атта чоңойдум. Атам да, таям да улакчы болушкан. Ар дайым алардын жанында болуп, айылдагы улак оюндарына күбө болдум, ушул чөйрөдө чоңойдум. 15 жашымдан баштап айылымда «жер улак» ойноп баштадым.
Бирок 17 жашымда оюн учурунда оор жаракат алып, жамбашымдын сөөгүн сындырып алдым. Ошол себептен эки жыл бою улакка катыша алган жокмун. Калыбына келгенден кийин бир аз убакыт «жер улак» ойнодум, ал эми 2024-жылдын аягынан баштап «казан улак» оюндарына катыша баштадым», - деди ал.
Аманкелди акыркы жылдагы кок-борудагы жетишкендиктери менен бөлүштү. «Биринчи жолу Таш-Мойнок айыл өкмөтүнөн «казан улакка» чыктык. Ал кезде Чүй облусунда облустук мелдештер өтүп жаткан. Бир оюнда Суусамырдан келген күчтүү командага каршы ойногонго туура келди. Чынын айтсам, биз утуп кетебиз деп ойлогом, анткени бул менин «казан улакка» биринчи жолу чыгышым, дагы күчтүү атаандашка каршы. Бирок биз жеңишке жетип, акыры команда менен үчүнчү орунду ээлеп алдык. Андан кийин 31-августта «Жаш-Тилек» командасынын курамында президенттин кубогунда катышып, 4-орунду алдык, мен «Эң мыкты жаш улакчы» наамын алдым. Ошол мезгилде Чүй облусунун жаштар курама командасы Таласка мелдештерге барып, кайрадан үчүнчү орунду ээлеп, мага «Эң мыкты чабуулчу» наамы берилди. Жакында Чүй облусундагы райондор аралык кок-бору мелдештеринде Аламедин районунун командасы менен чемпион болуп, «Эң мыкты оюнчу» деп таанылдым», - деди жигит.
Аманкелдинин айтымында, ал кок-боруну өтө кооптуу спорт түрү деп эсептебейт. «Энем бир аз тынчсызданды, каршы болду. Ал эми атам, өзү улакчы болгондуктан, эч качан каршы болгон эмес. Келечекте менин максатым — Кыргызстан курама командасына кирүү. Эркин убактымда ат минип, футбол ойноп, чарбалык иштерге жардам берип, малга кам көрөм», - деди ал.
Аманкелди Эсенкелдиев үйлөнгөн, бир баланы тарбиялап жатат.
