23-январда Бишкекте Кыргызстандын тышкы иштер министринин орун басары Медер Абакиров менен ОБСЕнин Программалык кеңсесинин жетекчиси Фолькер Фробарттын ортосунда жолугушуу өттү. Бул тууралуу маалымат өлкөнүн Тышкы иштер министрлигинин басма сөз кызматы тарабынан жарыяланды.
Жолугушууда Кыргызстан менен ОБСЕнин өз ара аракеттенүүсүнүн актуалдуу маселелери, ошондой эле 2026-жылга кызматташтыктын негизги багыттары талкууланды.
Тараптар жакында боло турган жогорку деңгээлдеги визиттерди, атап айтканда, ОБСЕнин башкы катчысы Фериду Синирлиоглунын Кыргызстанга күтүлүп жаткан сапарын, ошондой эле БДИПЧ директорунун жана ОБСЕнин медиа эркиндиги боюнча өкүлүнүн мүмкүн болгон визиттерин карашты. Кыргыз тарап бул визиттер үчүн зарыл болгон уюштуруу колдоосун камсыз кылууга жана өлкөнүн жетекчилиги менен маанилүү жолугушууларды уюштурууга даяр экенин билдирди.
Ошондой эле ОБСЕнин регионалдык инициативаларын, анын ичинде чек ара кызматташтыгы жана Борбордук Азияда ишенимди бекемдөө боюнча долбоорлорду ишке ашыруу перспективалары боюнча пикир алмашуу жүргүзүлдү.
Жолугушуунун аягында тараптар Кыргызстан менен ОБСЕнин ортосундагы өнөктөштүктү өнүктүрүүгө болгон берилгендиктерин, урматтоо, ачык диалог жана кабыл алуучу тараптын кызыкчылыктарын эске алуу принциптерине негизделгенин растады.
