Жогорку Кенештин жыйынында спикер Нурланбек Тургунбек уулу жаңы гимн үчүн сунушталган варианттардын эч бири ылайыктуу эмес экенин билдирди.
Ал: «Кечээ комитеттин жыйынында биз сунушталган бардык варианттарды угуп чыктык, бирок алардын эч бири жарабайт», — деп белгиледи.
Спикер бул демилгени ишке ашыруунун негизги максаты учурдагы гимнды алмаштыруу эмес, 7 жаштагы балдардан тартып кары адамдарга чейин бардык жарандарга таандык, эстеп кала турган жана аткарыла турган чыгарма жаратуу экенин тактады.
Нурланбек Тургунбек уулу, ошондой эле, сунушталган музыкалык композициялардын көбү марштык стильде экенин кошумчалады.
«Гимн эркин угулушу маанилүү. Биз совет учурунда актуалдуу болгон марштан баш тартышыбыз керек», — деп баса белгиледи.
Спикер ошондой эле жаңы гимнды түзүү боюнча конкурс уланарын жана ага каалагандар катыша алаарын билдирди. Мындан тышкары, анын айтымында, өлкө президенти менен биргеликте конкурстун катышуучулары үчүн атайын сыйлыктар бекитилген.
