Алынган маалыматтарга ылайык, 1-февралда Балыкчы шаарындагы милиция бөлүмүнө 1999-жылы туулган Ж.Д. аттуу жергиликтүү тургун кайрылган. Ал өз арызында 31-январда Балыкчынын курамына кирген Ак-Өлөң айылындагы Орто-Бөйрөк аймагында белгисиз адамдар анын сарайынан бир кой уурдап кеткенин билдирген. Уурдалган малдын зыяны 20 000 сомду түзгөн.
Окуя Балыкчынын Ички иштер башкармалыгынын Бирдиктүү кылмыштар реестрине киргизилип, Кыргыз Республикасынын Кылмыш-жаза кодексинин 205¹-беренесине ылайык «Мал уурдоо» боюнча кылмыш иши козголгон.
ГОВД кызматкерлеринин «Арсенал» аттуу рейдинин натыйжасында шектүү — 1992-жылы туулган Ак-Өлөң айылынын тургуну Р.Н. кармалды.
Сурак учурунда шектүү өз күнөөсүн мойнуна алды. Балыкчы шаардык соту шектүүнү тергөө иштери аяктаганга чейин камакка алуу боюнча чара көрүү чечимин кабыл алды.
Тергөө уланууда.
