Чингиз Айтматов атындагы Кино үйүндө 20-февралда анимацияны жана балдарга арналган аудиовизуалдык контентти өнүктүрүү боюнча Консультативдик кеңеш түзүү маселесине арналган жыйын өтөт, бул тууралуу Кыргызстандын Маданият министрлиги маалымдады.
Кино өнөрү департаменти бул маанилүү демилгени көтөрүп чыкты. Негизги максат – балдар жана өспүрүмдөр үчүн билим берүү жана тарбия берүү аспектилерине багытталган улуттук анимацияны илгерилетүү, ошондой эле маданий идентичносту бекемдөө жана жергиликтүү авторлор менен студияларды колдоо.
Келечектеги кеңеш анимация жана балдар контентин өндүрүү боюнча стратегияларды иштеп чыгууга, ошондой эле сапаттуу жана атаандаштыкка жөндөмдүү улуттук продуктту түзүүгө көмөктөшүүгө багытталат.
Анын милдеттерине сунуштарды иштеп чыгуу, долбоорлорду карап чыгуу, сценарийлерди жана пилоттук иштерди колдоо, ошондой эле улуттук баалуулуктарга негизделген чыгармаларды өнүктүрүү кирет. Ошондой эле эл аралык тажрыйба киргизилип, сапат стандарттары жана жаш курак боюнча белгилөө системасы түзүлөт, ошондой эле билим берүү жана чыгармачылык мекемелери менен кызматташтык орнотулат.
Министрликте кеңештин түзүлүшү улуттук анимациянын системалуу өнүгүшүндө жана сапаттуу балдар контентинин туруктуу экосистемасын түзүүдө маанилүү кадам болоорун белгилешти.
