Президенттин ыйгарым укуктуу өкүлчүлүгүнүн маалыматына ылайык, 2026-жылдын 17-февралында Ош мамлекеттик университетинде президенттин өкүлү Аманкан Кенжебаев Европалык парламенттин делегациясы менен жолугушуу өткөрдү.
Жолугушуунун жүрүшүндө облустун социалдык-экономикалык өнүгүүсүнүн негизги аспектилери, анын ичинде инвестициялык потенциал, айыл чарба продукциясын кайра иштетүү жана жаңы жумуш орундарын түзүү маселелери талкууланды.
Талкуу трансчектик кызматташтык, легалдуу соода жана чек ара инфраструктурасын жакшыртуу маселелерин да камтыды. Жолугушуунун катышуучулары Европалык Союз тарабынан ишке ашырылып жаткан BOMCA программасынын алкагында чек араларды башкарууну жакшыртуу боюнча жүргүзүлгөн иштерди жогору баалашты.
Тараптар региондогу коопсуздук боюнча пикир алмашып, коомдук-саясий абалдын туруктуулугун, улуттар аралык макулдашууну жана чек ара аймактарындагы туруктуу кырдаалды белгилешти. Ошондой эле чек араларды санариптештирүү, контролдук өткөрмө пункттарын модернизациялоо жана укук коргоо органдарынын потенциалын күчөтүү боюнча иштер улантылат.
Европалык парламенттин делегациясы суу ресурстарын башкаруу жана чек ара кызматташтыгын өнүктүрүү боюнча Европалык Союздун долбоорлорунун маанилүүлүгүн белгиледи.
