Токто деген буйруктарды эске албастан, Volkswagen Crafter унаасынын айдоочусу чек ара контролунан качууга аракет кылган. Куугунтук учурунда анын аракетин SsangYong Rexton Sports унаасынын айдоочусу колдоп, тоскоолдуктарды жаратып, жүк унаасын чек арага тоскоолсуз жеткирүүгө аракет кылган.
Чек арачылардын кесиптик аракеттеринин натыйжасында эки унаа Достук айылында ийгиликтүү тосулуп, токтотулган.
Volkswagen Crafter текшерилгенде, зарыл ветеринардык жана товар коштоочу документтерсиз ташылып жаткан 36 баш кой табылган.
Токтотулган малдын алдын ала баасы болжол менен 1 000 000 сомду түзөт.
Мыйзамсыз алып кетүүнү уюштуруу жана жардам берүү фактысы боюнча Кыргыз Республикасынын үч жараны, Баткен облусунун тургундары: Г.С.К. (1984 ж.т.), Т.Р.У. (1983 ж.т.) жана Н.К.К. (1984 ж.т.) кармалды.
