Бишкекте Кыргыз Республикасынын Министрлер кабинетинин орун басары Эдиль Байсалов ОБСЕнин программалык офисинин жетекчиси Фолькер Фробат менен жолугушуу өткөрдү.
Министрлер кабинетинин маалыматына ылайык, бул жолугушуунун алкагында Эдиль Байсалов элчини жаңы дайындалышы менен куттуктап, келечектеги ишинде ийгиликтерди каалады. Ал Кыргыз Республикасы ОБСЕни коопсуздук жана кызматташуу маселелери боюнча тең укуктуу жана конструктивдүү диалог үчүн негизги платформа катары кабыл алат деп баса белгиледи, демократиялык принциптерге, мыйзамдын үстөмдүгүнө жана адам укуктарын коргоого болгон берилгендигин кайрадан тастыктады.
Сүйлөшүүлөрдө кызматташтыктын маанилүү багыттары, анын ичинде коррупцияга жана уюшкан кылмыштуулукка каршы күрөш, мамлекеттик башкарууну санариптештирүү, ошондой эле сот жана укук коргоо системаларын реформалоо талкууланды.
Ошондой эле Бишкектеги ОБСЕ Академиясынын андан аркы өнүгүүсүнө байланыштуу маселелер, анын ичинде институттук түзүлүшү жана салык аспекттери каралды.
Жолугушуунун натыйжасында эки тарап Кыргыз Республикасы менен ОБСЕ ортосунда конструктивдүү кызматташтыкты күчөтүүгө даярдыгын тастыктады.
