2025-жылдын башынан бери «Кундолук» электрондук күндөлүгүндө «Коркпо, билдир» анонимдик функциясы аркылуу 25 миңден ашык кайрылуулар катталган. Бул тууралуу КР Билим берүү министрлигинин тарбия жана мектептен тышкаркы билим берүү бөлүмүнүн башчысы Алтынбек Эркимбеков «Кабар» агенттигинин «Элге собол» программасында билдирди.
Эркимбеков бул функциянын киргизилиши балдарга карата зомбулук учурларын тез арада аныктоого жана аларга зарыл коргоону камсыздоого багытталганын белгиледи. Азырынча арыздар кол менен иштелип жатат, бирок процесс толук автоматташтыруу үчүн донорлор менен иш жүргүзүлүүдө.
«Окуучулар зомбулуктун кандайдыр бир формаларына туш келгенде «Коркпо, билдир» бөлүмүндө билдирүү калтырууга мүмкүнчүлүк алышат. Бул билдирүүлөрдүн маалыматтары реалдуу убакыт режиминде Билим берүү министрлигине жана Ички иштер министрлигине келип түшөт. Келечекте биз системага Саламаттыкты сактоо министрлигинин жана Социалдык өнүктүрүү министрлигинин адистерин кошууну пландап жатабыз, ар бир уюм өз ыйгарым укуктарынын чегинде реакция кылууга мүмкүнчүлүк алат. Анонимдик сигналдардын саны жаш өспүрүмдөр арасында жашыруун проблемалардын бар экенин тастыктап турат, алар мурда сүйлөшүүгө даяр эмес болушкан. Мен бул колдонмо балдар арасында зомбулукка каршы күрөшүүдө маанилүү инструмент болот деп ишенем», - деди ал.
Ошондой эле министрликтин өкүлү 2025-жылдын ноябрь айында жүргүзүлгөн изилдөөнүн жыйынтыктарына ылайык, балдар арасында эң кеңири таралган зомбулук түрлөрү психологиялык жана физикалык зомбулук, ошондой эле кибербуллинг экенин маалымдады.
