Бул маалыматты Жалал-Абад облусунун Ички иштер башкармалыгынын басма сөз кызматы берди.
Ведомствонун маалыматына ылайык, 22-февралда район аймагында кылмыштуулукка каршы күрөшүү боюнча жүргүзүлгөн оперативдик иш-чаралардын алкагында «Бандит», «Кража» жана «Подросток-ночь» аталышындагы операциялардын жүрүшүндө Аксый РОВДнын кызматкерлери «Audi 100» маркасындагы унааны жолдун бир жеринде токтотушту.
Транспорт каражатын текшерүү учурунда анын салонунда үч ок атуучу курал, ок-дарылар жана пакетке салынган жапайы жаныбардын эти табылды. Алынган куралдардын үлгүлөрүнө соттук-баллистикалык экспертиза дайындалды.
Бул аракеттер Аксый РОВДнын тергөө кызматы тарабынан кылмыштардын бирдиктүү реестрине катталды жана Кыргыз Республикасынын Кылмыш кодексинин 267-беренеси («Куралдын, ок-дарыларды мыйзамсыз жүгүртүү») боюнча кылмыш иши козголду.
Тергөө иш-чараларынын алкагында шектүүлөр кармалды: М.Б. (1958-жылы туулган), Б.Ж. (1972-жылы туулган) жана Р.С. (1971-жылы туулган).
Тергөө уланууда.
