Бүгүн, 17-мартта, Жогорку Кенештин конституциялык мыйзамдар, жергиликтүү өз алдынча башкаруу, мамлекеттик түзүлүш жана Регламент боюнча комитети «Кыргыз Республикасынын Жогорку Кенешинин депутатынын статусу жөнүндө» мыйзамына өзгөртүү киргизүү тууралуу мыйзам долбоорун карап, биринчи окууда жактырды.
Мыйзам долбоорунун демилгечиси — депутат Дастан Бекешев.
Депутат Дастан Бекешев өзгөртүүлөр «Кыргыз Республикасынын Жогорку Кенешинин депутатынын статусу жөнүндө» мыйзамдын 33-беренесине тиешелүү экенин белгиледи. Ал мыйзам долбоору Жогорку Кенештин депутаттарынын негизги жумушуна кошумча уруксат берилген ишмердик түрлөрүн так аныктоого багытталганын, «илимий», «педагогикалык» жана «шыгармачылык» ишмердиктердин терминдерин түшүндүрүүдөгы аныксыздыктардан улам депутаттарды мандаттан мыйзамсыз ажыратуу коркунучтарын жоюуга арналганын айтты.
Комитет ошондой эле «Кыргыз Республикасынын мамлекеттик сыйлыктары, ардактуу наамдары жана мамлекеттик премиялары жөнүндө» жана «Кыргыз Республикасынын Президентинин ишмердүүлүгүнө кепилдиктер жана Кыргыз Республикасынын экс-президентинин статусу жөнүндө» мыйзамдарына өзгөртүүлөрдү киргизүү тууралуу мыйзам долбоорлорун үчүнчү окууда карап, жактырды.
«Жогорку Кенештин депутатынын статусу жөнүндө» мыйзамдагы өзгөртүүлөр биринчи окууда парламенттик комитет тарабынан жактырылганы тууралуу жазуу K-News’та биринчи жолу пайда болду.
