26-мартта Кыргызстандын өкмөтүнүн орун басары жана суу ресурстары, айыл чарба жана кайра иштетүү өнөр жайы министри Эрлист Акунбеков минералдык тыңайткычтарды өлкөгө импорттоо менен алектенген компаниялардын өкүлдөрү менен жолугушуу өткөрдү.
Министрлер кабинетинин маалымат кызматынан билдиришкендей, талкуу учурунда импорттоочу компаниялар минералдык тыңайткычтарды жеткирүү боюнча учурдагы абал, республикага жеткирилген көлөмдөр, ошондой эле алар туш болгон баалар жана көйгөйлөр тууралуу маалымат беришти.
Жолугушуунун жыйынтыгы боюнча катышуучулар минералдык тыңайткычтарды убагында жана жетиштүү көлөмдө импорттоо үчүн чараларды кабыл алуунун маанилүүлүгүн, ошондой эле жаралган кыйынчылыктарды чечүүнүн жолдорун издөө керектигин белгилешти. Жолугушуунун жүрүшүндө минералдык тыңайткычтарды өлкөгө импорттоо жана жеткирүү менен байланышкан көйгөйлөрдү жоюу боюнча бир катар мамлекеттик мекемелерге тапшырмаларды берүү боюнча көрсөтмөлөр берилди.
