Кыргызстанда 2026–2027-окуу жылы үчүн 1-класска кабыл алуу 1-апрелден башталат, деп билдирди «Кабар» агенттигинде өткөн маалымат жыйынында билим берүү министринин орун басары Надира Жусупбекова.
Анын айтымында, 1-класска 2019-жылдын 1-январынан 31-декабрына жана 2020-жылдын 1-январынан 31-декабрына чейин төрөлгөн балдар кабыл алынат.
Кабыл алуу процессинин эки этапка бөлүнөт.
Биринчи этап 2026-жылдын 1-апрелинде саат 10:00дө башталат, ал мектептердин бекитилген микроучасткаларында жашаган жана жашаган жери боюнча каттоосу бар балдар үчүн арналган.
Экинчи этап 2026-жылдын 1-июнунда саат 10:00дө башталат жана ата-энелерге бош орундар болсо, каалаган мектепке документтерин тапшырууга мүмкүнчүлүк берет.
«Каттоо 1mektep.edu.gov.kg платформасы аркылуу, ошондой эле «Тундук» жана башка колдонмолорду колдонуу менен жүргүзүлөт», - деп кошумчалады ал.
Министрлик келечектеги 1-класска кабыл алынуучу балдардын ата-энелерин «Электрондук каттоо» системасы аркылуу балдарды алдын ала каттоого жана арыздарды берүү мөөнөттөрүнө көңүл бурууга чакырат.
