Бишкекте шаардык стационарлар үчүн референс-лаборатория түзүү долбоорунун алкагында Улуттук госпиталда активдүү иштер жүрүп жатат, деп билдирет Кыргызстандын Саламаттык сактоо министрлиги.
Жакында саламаттык сактоо министри Дамирбек Осмонов Улуттук госпиталды зыярат кылып, анын иши менен таанышып чыкты.
Башкы врач Бакыт Тологоновдун айтымында, азыр лаборатория жайгашкан имараттын ремонту жүрүп жатат. Иштин аякташы апрель айынын аягына пландалууда. Андан кийин жабдууларды орнотуу, кызматкерлерди окутуу жана лабораторияны толук кандуу иштөөгө даярдоо башталат.
Долбоор Азия өнүктүрүү банкы тарабынан колдоого алынууда жана шаардык стационарлар үчүн борборлоштурулган лабораториялык базаны түзүүгө багытталган. Бул Улуттук госпиталга лабораториялык изилдөөлөрдү борборлоштурулган форматта жүргүзүүгө мүмкүндүк берет, бул болсо диагноздордун сапатын жогорулатат жана изилдөөлөрдү жүргүзүүнүн бирдиктүү стандарттарын киргизет.
Бул долбоорду ишке ашыруу бир жылдын ичинде пландалууда.
