Ермак өзүнүн телеграм-каналында тергөө иштери эч кандай тоскоолдуксуз өтүп жатканын билдирди. «Бүгүн чындап эле менин үйүмдө процессуалдык иштер жүрүп жатат. Мен тергөөчүлөргө батириме толук кирүүгө уруксат бердим, жерде менин адвокаттарым бар, алар укук коргоо органдары менен иш алып барууда. Мен толук жардам көрсөтүп жатам», — деди ал.
28-ноябрда «Украинская правда» гезитинде жарыяланган маалыматка ылайык, тинтүү иштерин НАБУ жана САПтын 10го жакын кызматкери жүргүзгөн, бул маалыматты бюродо да тастыкташты. Тергөөчүлөрдүн визити окуянын жеринде тартылган сүрөттөрдө катталган.
Financial Times’тын кабарчысы Кристофер Миллердин маалыматына ылайык, Ермакка карата аракеттер «Энергоатом» мамлекеттик компаниясындагы коррупциялык схемаларды тергөө менен байланыштуу.
Украинада мамлекеттик энергетикалык компания «Энергоатомго» байланыштуу ири коррупциялык скандал жаралды, анын натыйжасында энергетика жана юстиция министрлери кызматтан кетишти. Бул иштин борборунда президент Зеленскийдин тааныш бизнесмени Тимур Миндич турат, деп билдиришет маалымат каражаттары. Маалыматка ылайык, Ермак бул белгилүү иштин материалдарында Али-Баба псевдоними менен аталган.
Кээ бир оппозициялык депутаттар жана президенттик фракция «Слуга народа» өкүлдөрү Ермактын кызматтан кетишин талап кылышууда, бул коррупциялык скандал «Миндичгейт» деп аталууда.
«Слуга народа» фракциясынын депутаттары менен жолугушуудан кийин Украина президенти Ермакты кызматтан алуу пландары жок экенин билдирди.
