Президент белгилегендей, тогуз жыл мурун $100 миллиардга жетүү максаты өтө амбициялуу тапшырма болуп көрүнгөн. «Бүгүн болсо биз биринчи жолу ИДП $145 миллиарддан ашкандыгы менен сыймыктанабыз. Бул биздин элдин чоң мүмкүнчүлүктөрүн көрсөтөт», — деди ал.
Мирзиёев ошондой эле «Өзбекстан – 2030» стратегиясына көңүл бурду, анда 2030-жылга чейин ИДПны $160 миллиардга жеткирүү максаты коюлган. Бирок, анын айтымында, учурдагы реформалардын темпи жана бизнес активдүүлүгү бул болжолдорду кайра карап чыгууга мүмкүнчүлүк берет.
«Биз бул максатка 2026-жылы эле жетишибиз мүмкүн», — деп кошумчалады президент.
Ал жаңы технологияларды киргизүү жана адистерди даярдоо аркылуу өлкөнүн экономикасы келерки беш жылда $240 миллиардга чейин өсүшү мүмкүн экенин баса белгиледи.
Быйылкы жылдын жетишкендиктери арасында экспорттун 23%га жогорулашы, ал $33,4 миллиардды түздү, ошондой эле биринчи жолу $60 миллиарддан ашкан алтын валюта резервдеринин рекорддук деңгээли бар.
Чет өлкөлүк инвестициялардын көлөмү $43,1 миллиардга жетти, алардын ИДПдагы үлүшү 31,9%ды түздү. Бул инвестициялар Өзбекстандын жакынкы жылдардагы туруктуу экономикалык өсүшүнүн негизин түзөт, деди президент.
Эл аралык рейтинг агенттиктери Өзбекстандын суверендик рейтингин «BB-»дан «BB»га көтөрдү.
«Бул өзгөртүү чет өлкөдөн тартылган ресурстар боюнча пайыздык ставкаларды 1-1,5 пунктка төмөндөтүүгө жана тышкы карыз боюнча чыгымдарды жылына $250-300 миллионго азайтууга мүмкүндүк берет», — деп түшүндүрдү Мирзиёев.
Мындан тышкары, Өзбекстан Дүйнөлүк банктын технологиялык жетилгендик индексинде 71 позицияга жогорулап, мыкты он өлкөнүн катарына киргенин кошумчалады президент.
