Кыргыз Республикасында массалык башаламандыкты уюштурууга шектелген адамдар кармалды. Бул тууралуу өлкөнүн Ички иштер министрлиги билдирди.
ИИМдин маалыматына ылайык, 9-февралда массалык маалымат каражаттарында жана социалдык тармактарда 75 жаран президент Садыр Жапаровго жана Жогорку Кеңештин төрагасы Нурланбек Тургунбек уулуна жаңы президенттик шайлоолорду өткөрүү боюнча сунуш менен кайрылышкандыгы тууралуу маалымат пайда болгон.
Бул кайрылууга кол койгондордун арасында илимпоздор, мурдагы премьер-министрлер, мурдагы депутаттар жана белгилүү коомдук ишмерлер болгон.
Бул кайрылууда камтылган айрым билдирүүлөр коомчулукта чоң талкуу жараткан жана өлкөдөгү саясий кырдаалды курчутууга себеп болгон.
Ошондуктан, ИИМдин тергөө бөлүмү Кыргыз Республикасынын Кылмыш-жаза кодексинин 278-беренесинин 1-бөлүгүндө каралган кылмыш белгилери боюнча кылмыш ишин козгоду. Бүгүн кайрылууда көрсөтүлгөн 75 жаран тергөө иш-чараларын өткөрүү үчүн жеткирилди.
Башаламандыкты уюштуруучулар жана активдүү катышуучулар – Т.Б. жана У.Э. (1955-жылы туулган), Д.К. (1960-жылы туулган) кармалды. Алар КРнын Кылмыш-процессуалдык кодексинин 96-беренесине ылайык тергөө изоляторуна жайгаштырылды. Ошондой эле алардын турак жайларында тинтүү жүргүзүлдү.
Ички иштер министрлиги жарандарды провокацияларга алдырбоого жана жалган маалыматтарды таратууга каршы болууга чакырат.
